Монгол Улсын Ерөнхийлөгч У.Хүрэлсүхийн 7 дугаар сарын 23-26-ны хооронд Бүгд Найрамдах Тажикистан улсад хийж буй төрийн айлчлалын үеэр Аюулгүй байдал судлалын хүрээлэн Бүгд Найрамдах Тажикистан Улсын Ерөнхийлөгчийн дэргэдэх Стратегийн судалгааны хүрээлэнтэй “Хамтын ажиллагааны санамж бичиг” байгуулав. “Хамтын ажиллагааны санамж бичиг”-т Аюулгүй байдал судлалын хүрээлэнгийн захирал Г.Ганболд, Бүгд Найрамдах Тажикистан улсын Ерөнхийлөгчийн дэргэдэх Стратегийн судалгааны хүрээлэнгийн захирал Усмонзода Хайридин нар гарын үсэг зурлаа.
Хүрээлэнгүүд хамтын ажиллагааны санамж бичиг байгуулснаар олон улсын харилцаа, бүс нутаг болон дэлхий дахины аюулгүй байдал, эдийн засаг, нийгмийн хөгжлийн тулгамдаж буй асуудлуудыг хамтран судалж, туршлага солилцох эрх зүйн үндэс бүрдэж байна. Цаашид талууд дээрх чиглэлээр хамтарсан судалгаа хийх, харилцан туршлага солилцох, эрдэм шинжилгээний хурал, академик хэлэлцүүлэг, семинар зохион байгуулах зэргээр хамтран ажиллана.