Аюулгүй байдал судлалын хүрээлэн МУИС-ийн Нийгмийн ухааны салбарын Сэтгүүл зүй, олон нийтийн харилцааны тэнхимтэй хамтран Монгол Улсын их дээд сургуульд сэтгүүл зүйн чиглэлээр суралцаж буй оюутан залуусын судалгаа, эрдэм шинжилгээний мэдлэг, ур чадварыг хөгжүүлэх, судалгааны бүтээлч санаачилгыг идэвхжүүлэх замаар сэтгүүл зүйн салбарын хөгжлийн чиг хандлага, тулгамдсан асуудал болон сорилт, боломжуудын талаарх судалгааны шинэ бүтээл, үзэл санааг хөгжүүлэх, олон нийтэд түгээн дэлгэрүүлэх зорилгоор бакалаврын түвшний оюутнуудын дунд ЭШ-ний өгүүлэл, илтгэлийн уралдаанийг 11 дүгээр сарын 10-ны өдөр зохион байгуулав.

Оюутнууд мэдээллийн тэнцвэрт байдал ба олон нийтийн эрх ашиг, төөрөгдүүлсэн мэдээлэлтэй тэмцэж буй олон улсын туршлага, мэдээллийн аюулгүй байдал ба хэвлэл мэдээлэл, Монголын хэвлэл мэдээлэл дэх олон улсын үйл явдлын мэдээ, мэдээлэл сэдвийн хүрээнд цэцэн ухаан, хурц үзгээ уралдуулан өрсөлдөж, “Хүүхдийн эрхийг хөндсөн асуудлыг тэнцвэртэй мэдээлэх нь” илтгэлээр МУИС-ийн оюутан Б.Нарангэрэл, Г.Хэрлэн нар тэргүүн байр, “Мэдээллийн тэнцвэрт байдал ба олон нийтийн эрх ашиг” илтгэлээр МУИС-ийн оюутан Б.Маралмаа дэд байр, “Төөрөгдүүлсэн мэдээлэлтэй тэмцэж буй олон улсын туршлага ба Монгол Улсын нөөц боломж” илтгэлээр ХИС-ийн оюутан Б.Түшигт-Эрдэнэ гутгаар байр эзэллээ.